Khainsumah

 Election to N.C.Hills Autonomous Council Constituencies, 2013

(Lantern) Election Symbol of

DIMA HASAO DOL

Date of Election: 20th May 2013 

Time of vote casting: 7 AM to 4 PM.

********************************************************************************************************

Manganang Rajirao,

 

         Sgangtauha kribne jini khasuni hamjauma khasauma khanarilahadu. Nisi kribbo mithiladu je phaiginyaba 20 MAy 2013 sainkhali majiseba N.C.Hills Autonomous Council election jama thangdu. Maithaikhon jadidih yaudi dihi andolon klaihi phaidada haphaini hambani klaihi jini sainyaba maiphainbuthukhe sainlaiphlengmane 2003 maithaiha Bharat sarkar ode Assam sarkar jang zbah-lengoha donglaiba. Buduglujang thikhabo lailangyaba maithaiha Bharat sarkar ode Assam sarkar DHD sainyababuthuni basauha duhani Dima Hasao Auto. Councilne pawar bangridauhi ode stetaskhe gakudaurihi rebthailaimane raji jabaha DHDbo haphaini shantini graokhe baudada raji jahi rebkhaulaiba. Laulauni ebo yaudidophayaba andolonha DHDni 158 sengyah jang bausi civil jahi khusi dangphayarao, PRO buthubo mamahni hatanni klaihi hang garba. Jing bonsini Dimarajine phanta, jadini magrao, yauwaimin smakhe tathikumane sogorihi dengmane phanta hang garthaikhe klimladu. DHD bauladu je sainlaiphlenghi rebkhaulaiyaba bathai ganang janang odehe haphaini shanti ode krib gede niphrang hamkhudaumaniIndia Bharat sarkarbo kha mu jang MoS-khe khusiha phnangnang.

        Dongphrang dangphrang giriyaba Dima Hasao Autonomous Councilni (DHAC) rajnitiha hadi-baryungni oniya lailangyaba maithaibowaha bri Chief Executive Member (CEM) slaima nangsi jaba hato ode lailangyaba 8 Oct’2012 maithaiha Bharat sarkar, Assam sarkar ode DHD jang Memorandum of Settlement (MoS)ha rebkhaulaihi rajnitini jarmin khongsi sangsaibani thik bo joraha nisi rajiraokhe majiseba (11th)NCHA Council Constituencyni eleksonha Councilkhe hamsisi salailangmane bhot reehi dereemane longthimladu. Lailangyaba 9 March 2013 sainkhali yaudi dangklaihi rajikhorha gabasobani yahonha Dima Hasao Jilani bhot rajnitiha yaudi dihi andolon klaiyarao duhase gabahjenba. Thangdauyaba grao jakha jing rajiraoniha smai danghi sainthiladu je masi gejebtiti Council ode MoS-khe kha-mu jang khusiha dangreesomani jini baothirkhe gibi slamsomane nisini mulyoganang bhotkhe reehi dereemane bihlahadu. Odebani du phaiginyaba North Cachar Hills Autonomous Councilni (11th) eleksonha Dima Hasao Jilane phanta hamsining masi nangneyaba graose.

 

                           JINI GRAO REEYABA BEREN

• MoS-ha rebkhujauyaba khusi habah berenkhe kha mu jang dangreesoma.
• Rang hadam ode rang yauwaithai beren jayayabani blamha DHACni administrative systen graode naiso-nusokhe naislamma.
• Nolaini lamah berensikhe Mahasadak ode Stateni lamahni lugu juphama.
• Nolai ode town haphaiha dongyaraosi krib Dimasa ode noharini gibin tribalraoni shikka graode ringba poriba/saosaishtyo/lingyaba dini hamba blam smakhe rontik reema.
• School, High School ode college buthukhe provincialisation klaimane nangba maphi        sanganing yaphri surma.
• Dima hasao Jilani krib departmentni mailam/salary taubro taubra girihi dainphrong maillangmani blam klaima.
• Village Council/Gram Sabha kharihi nolaisaraone jar jang jar nailailaphugone rang hadam smani habaha power yauphama.
• Dimasa ode gibin gibin jadini Jonthai, Hojairao, madai sowayarao odehe daikho smane dainphrong mailam(honorarium) rima.
• Jadi jadi hybrid/ nalaini bathai-bikim smakhe baiganik poddoti jang hadi hagong dangbakhe, yungma khrangbakhe bol sengdauma.
• Dimasa ode gibin tribalraoni magrao, yauwaimin, dara-disa buthukhe tathikhumani ode hamkhudaureemani habaha nangba nangba yaphri surma.
• Jadungyasaroani oniya hakma jayaraoni nokhor ode jar-reemjaulayaba jadungyasaraone jurumah ode bonsikhe nalai sgangha dongbalei japhinbaha juruma.
• Muzadar/Sarkari Gaon Bura ode GBraoni mailam buthukhe bangdaureema.
• Muzadar/SGB ode GBraone bonsini jar jarni jadini yauwaimin daradisah maphi dress/ gainsari-phinsari reema.
• MoS-ha rebkhujauyaba khusi habah berenkhe kha-mu jang ranphahi dangreesoma.

                                                        *************************
 

• Danggajai klaiyaraoni rau-bojomkhe gasholai. Gadain Dima Hasao Jila slammane Dima Hasao Dolkhe bhot reehi deree.
• Jiseb ode danggajai klaiyarao, rang-rih lootphoot klaiyarao hojaraoni yau nising Dima Hasaokhe sogone Dima Hasao Dolkhe bhot reehi deree.
• Dima Hasao Dolkhe dereehi Dima Hasao Autonomous Councilkhe gejebdauree ode Councilni dongthir labuphinree.a Dima Hasaoni sosi hamkhudauma, jakhudauma ode dongthir dangthir labumane klaihi Dima Hasao Dolkhe Vote ree.
• Masi bhot jang slaithai labuphudu--- ebo ninibo jalaphure.a Rang beseng jang braijauyagone grikhi dongla.a Dima Hasao Dolne bhot ree. Dima Hasaoni jathai slaimane bhot ree.

                                          *************************************************************************

                             Juthai

                                                                                      (Dilip Nunisa)
                                                                                           Melhoja

                                                                                       DIMA HASAO DOL

                                                                      H.O.: Haflong, Dima Hasao District, Assam